Burlesk Bangus

MBA Bloopers

Pinoy Central TV (PCTV) Chatroom: 2001-2005

(Paunawa: Ang post na ito ay puno ng aking personal na “kajejehan”.)

Nitong mga nakaraang linggo, napag-usapan namin ni Rei sa Plurk ang tungkol sa PinoyCentral TV Chatroom (PCTV Chatroom). Ang PCTV ay isang cable channel na pag-aari ng ABS-CBN at tumagal sa ere magmula taong 2001 hanggang 2005. Isa itong paraan ng pagchachat na imbis na internet at computer ang kaharap mo ay cellphone (na may load syempre) at cable TV ang kakailanganin. Noon namin nalaman na pareho pala kaming PCTV chatter. Medyo hindi nga lang kami aware noon dahil siguro, mas nauna siyang magregister sa PCTV kesa sa akin at medyo hindi naman talaga kasi ako masyadong aktibo kung makipagchat dito.

Kung tutuusin, hindi sinasadya ang pagkakadiskubre ko sa PCTV. Taong 2003 ‘yon. Pag-uwi ko ng bahay galing sa eskwela, nanood ako ng cable. Palipat-lipat. Hanap ng magandang palabas. Hanggang sa mapadpad ako sa channel na above 50 na. Dito madalas ‘yung cable channel na puro programa na ng iba’t ibang nasyon ang mapapanood tulad ng Koreano (Arirang), Bumbay, Hapon (WOWOW! Ang bold ng mga Hapon!), at ilang local channels mula sa ating bansa. Aksidente kong napindot ang remote sa PCTV. Ang una ko talagang napansin dito ay ang kanilang music videos. Dahil bukod sa basketball ay MTV ang bukod tanging pinapanood ko noon, naengganyo akong tumutok sa PCTV.

Lumipas pa ang ilang linggo ng pagtutok bago ko napansin ang chatroom sa gilid ng music videos sa PCTV (makikita sa ikalawang larawan ang isang halimbawa ng typical PCTV screen). Natuwa rin akong magbasa ng mga mensahe ng chatters doon. May mga nagkakamustahan, may mga nakikipag-away, may mga nagpapaskil ng cellphone numbers at naghahanap ng textmates, may mga naglalandian, at kung anu-ano pa. Tipikal na chatroom, ika nga. Pero sa totoo lang, hindi pa ako aware na ‘yun pala ang chatroom. Medyo late ko nang nadiskubre ang Yahoo! Messenger at Chatroom nito. At sa madalas kong pagbabasa ng mga mensahe sa PCTV, naengganyo tuloy akong mag-register sa chatroom na ito. Tinipa ang CREG <space> <*chat nickname ko na nakalimutan ko na dahil isang araw ko lang ginamit*> at sinend sa pamosong 2366. At voila! Pwede na akong makipagchat gamit ang cellphone.

Ang punto ko siguro ng pagsali sa PCTV Chatroom noon bukod pa sa pagbabasa ng mga mensahe ay para makita ang text message ko sa TV screen. Bata pa lang ako noon at masaya na ako sa mga simpleng bagay na tulad nito. Medyo hindi pa nga ako masyadong naadik sa pagchachat noon sa PCTV. Minsan, ayos na sa akin ang magsend ng isa o dalawang text message sa isang araw (sayang din ang ₱2.50 ko!). Tapos halos wala akong ka-chat doon. May sariling mundo ako kumbaga. Kung mag-text man, simpleng “hello” at “bye” lang, makita ko lang ‘yung chatnick ko sa TV screen. Kaya patunay lang ito na noon pa man ay medyo may pagka-introvert na ako (ano daw?).

Hindi ko talaga alam kung bakit masasabi kong naadik ako noon sa PCTV. Siguro dahil sa music videos. Pwede rin dahil sa interface nito. O kaya’y mga side events tulad ng promos at games. O kaya’y pakikipag-sosyalan sa mga kapwa ko chatters. Pero ilan sa mga naaalala ko sa PCTV Chatroom ay ang mga sumusunod:

• Chat Nicknames/Colors. Kung ihahalintulad natin ang PCTV sa Tumblr, malamang sa alamang eh walang makakakilala sa akin. Halos linggu-linggo kasi ako kung magpalit ng chatnick sa PCTV. Nagsimula ako sa (nakalimutan ko na ‘yung unang chatnick ko na isa o dalawang araw ko lang ginamit). Nasundan pa ito ng Warjetzz, Gungrave, Phantasma (ito ang pinakapaborito ko dahil dito ako nagkaroon ng maraming kaibigan at dito ako nakilala LOL), Hitman, Enclave, at Superfly. Pero saan ko nga ba nakuha ang mga chatnicks ko? Nakuha ko sila sa Tips & Tricks, isang magazine ng mga cheats at codes ng iba’t ibang video games (sa makatuwid, mga titulo ng video games ang chatnicks ko). Sa totoo lang, random lang ang pagpili ko ng maaaring gawing chatnick noon. Basta’t astig sa pandinig, okay na, kahit wala akong kaalam-alam sa larong ‘yon. At para mas cute, maaari mong palitan ng kulay ang chatnick mo, imbis na gold lang (default color). Merong light blue, orange, red, gray, violet, pink, yellow at beige. Buhay makulay!
• Typical Messages. Dahil minsan lang akong magtext sa PCTV Chatroom, halos hindi na nagbago ang formula ko sa pagchachat. Sinisimulan ko ng pagbati: “Eow, gud PM!”, kasunod ang pagbanggit sa mga chatters na kasalukuyang naka-monitor sa PCTV sa mga oras na ‘yon. Wala lang, gusto ko lang silang batiin kahit hindi ko sila ka-close. (see PHANTASMA’s text message on the third picture)
• TV Chatroom Terms. Kung sa Tumblr ay nauso ang “what is air”, “hnnng”, “srsly”, at iba pa, sa PCTV naman nag-ugat ang “logging in” (kapag unang beses mong magchat sa araw na ‘yon; palatandaan para malaman ng chatters na nakatutok ka na sa PCTV), “logging out” (kapag aalis ka na; katumbas din ng “GTG” o “AFK”), “NOMO” (“No Monitor”; ibig sabihin, hindi ka nakatutok sa iyong TV screen sa mga oras na ‘yon), “karir” (“career”; ibig sabihin, karelasyon/ka-fling/kalandian), “agimat” (pinaka-unlitext sa PCTV noon), at marami pang ibang mga salita.
• Text Chatroom Clans. Sa puntong ito, sigurado akong alam ninyo ang ibig sabihin ng “clan”. Noong kapanahunan ng PCTV, iba’t ibang clans ang umusbong. Nariyan ang Rush, Shadow Gold Heartz (bwahaha), ang clan ng mga rakista na Death Incorporated (Death Inc.), Sociable Generation (SocGen), ang clan ng mga karerista na Group R, ang pamosong True Brown Style (TBS), Tropang Pasaway Tropang Walalang (TPTW), at marami pang iba. Medyo hindi ako sumasali sa clans noon. Kaso, kapag nagpopost ako ng cellphone number eh maraming nagtetext sa akin at nirerecruit ako sa kanilang clan. Para sa kaalaman ng lahat, miyembro ako noon ng “Shadow Gold Heartz” (natatawa talaga ako sa pangalang ‘to) at ‘yung isang clan na nakalimutan ko na ang pangalan. Pero hindi ako nagparticipate sa mga eyeball o EB noon. (see GUNGRAVE’s text message on the third picture)
• PCTV Pioneers. Kung merong Tumblr Famous ngayon, meron namang PCTV Pioneers noon. Pero taliwas sa nakasanayang pagdedeny ‘kuno’ ng mga Tumblr Famous, kung PCTV Pioneer ka, kailangan ay maging proud ka. Ipagmayabang mo na PCTV Pioneer ka by making a tag: <PCTV PIONEER> o kaya <PCTV CHATTER SINCE JANUARY 1 2001>. Sa ganitong paraan, hahangaan ka ng mga kapwa mo chatter, lalo na ng mga PCTV Newbies. Kumbaga, mataas ang tingin ng lahat sa iyo kung PCTV Pioneer ka. Sinu-sino nga ba ang PCTV Pioneers noon? Hindi ako sigurado dito pero ang alam ko, nasa listahan ng pioneers sina Hemoglobin, Red Marlboro, Sexychiq, Stepipay, Sexyhalay, Bishop, Jasrac, Marc Logan, Kalai, Chintz, Sexycandy, Lil Enzo (ang hari ng mga Jejemon), at iba pa. Ako? Hindi ako pioneer dahil 2003 na ako nag-register.
• PCTV Textjocks. Sila ang moderators ng chatroom. Kung merong Disc Jockey (DJ) at Video Jockey (VJ), syempre meron din sa chatroom. Apat lang na TJs sa PCTV ang pamilyar ako: Sina Textjock Geri (babaeng kalog kausap at mahilig sa “ehehheh”, pero sa tingin ng karamihan eh lalake ito), Textjock Thursday (babaeng sweet kausap at sexy sa chat pero chubby siya), Textjock Lio (lalakeng version ni TJ Thursday), at si Textjock Emer (pinaka-boring na TJ dahil walang kwenta kung magreply; puro ok, bye, mwah, eow at iba pang ga-utot na salita). Sila lang sa chatroom ang bukod tanging kulay gold ang fonts.
• PCTV Games. Bukod sa music videos, sa PCTV Games talaga ako pinaka-nahumaling. Lumalabas ang games sa gilid ng screen, katabi ng text box at nasa ilalim ng music video (makikita sa ikalawang picture). Merong apat na uri ng PCTV Games: Xpot (mala-sudoku siya, itetext mo lang ang code ng box at makaka-earn ka ng points kapag may bonus ang box na ‘yon, basta parang ganoon), Brainsalad (multiple choice trivia question), Math-Tinik (multiple choice math question), at ‘yung isang game na nakalimutan ko na. Ano nga ba ang silbi ng games? Kapag nag-top score ka sa isang laro, magiging pink/green/orange/blue ang kulay ng chat message mo sa loob ng isang araw. Hindi ito normal dahil ikaw lang na top scorer ang magkakaroon ng pribilehiyong ito. (see CHATNICK’s last three messages on the third picture for example)

YM Emongoloid

Si inay at si P-Noy.

Random Fact: Mas naipapahayag ko ang gusto kong sabihin kapag sinusulat o tinatype ko ito.

Kaya kapag may nakakausap ako sa text o chat o kahit saan sa internet eh mapapansing ang haba kong magreply. Kahit naman kapag nagbo-blog ako, ang haba-haba kong magkuwento, kahit na ‘yung iba eh parang wala namang patutunguhan.

Kaso, baliktad naman ang sitwasyon ko sa tunay na buhay. Hindi ko masyadong maipahayag ang sarili ko kapag ganoon. Sa katunayan, hindi mo ako mapagsasalita hangga’t hindi mo ako kinakausap. Hindi kasi ako approachable. Kung sa internet world eh para akong memory card, sa tunay na buhay eh para lang akong posteng dinadaan-daanan. Hay nako. Kaya tuloy walang magkagusto sa akin eh. Natural, sino nga ba naman ang magkakagusto sa mabait na pangit at tatanga-tangang hindi approachable, ‘di ba? Emongoloid 2011.

Maski itong random fact na ito, parang walang patutunguhan. Pati ang nananahimik na memory card at poste eh dinamay ko. Putaragis. Ito siguro ‘yung epekto ng pagkaka-miss ko sa iyo.

Punyemas. Ang daldal ko na.

Random Fact: Kapag meron akong madalas na ka-text o ka-chat, madalas akong mahawa sa paraan ng pagte-text o pagcha-chat ng taong ‘yon.

Madalas akong ganyan. ‘Yun bang halimbawa mo, kapag ‘yung kausap ko sa text o sa chat eh madalas magsabi ng ‘hahahaha’, mag-emoticon ng ‘:p’, o kaya magbanggit ng ‘sorry’, eh napapa-‘hahahaha’, ‘:p’, at ‘sorry’ din ako kapag s’ya ‘yung ka-text o ka-chat ko.

Sigurado akong kayo din eh ganito minsan. Hehehe! Wala lang.

Nakakatuwang isipin na sa kabila ng lahat ng mga pinagdaanan namin noon eh nananatili pa rin kaming matalik na magkaibigan hanggang ngayon. Nagkakamustahan, nagkukuwentuhan, at nagpapayuhan kami sa isa’t isa na parang walang nangyari sa amin. Minahal namin ang isa’t isa noon, parehong nasaktan, at ngayon kami ay kapwa naka-move on na. Wow, ang landi. Hehehe.

Kinilig ang tuhod ko.

Si Inay at si Andi Eigenmann

Si inay at ang dalagang si Kris Aquino

Si itay at ang Franco.